Ҷангидан дар Рикоби Расулуллоҳ (С)
Ҳазрати Зубайр (р) дар тамоми ҷангҳои Паёмбар бо куффор ва мушрикин Расулуллоҳ (с) ро ҳамроҳӣ мекард. Аз он ҷумла: Бадр, Уҳуд, Хандақ, Ҳудайбия, Хайбар, Фатҳи Макка, Ҳунайн ва Тоиф. Дар ҷанги Аҳзоб низ ҳазрати Зубайр (р) тавонист ифтихор ва имтиёзи дигареро касб намояд. Дар яке аз набардҳо Расулуллоҳ (с) фармуд: Чи касе ҳозир аст ба назди душмани мо Бани Қурайза биравад ва иттилоъотеро бароямон ҷамъоварӣ кунад? Ҳазрати Зубайр (р) фавран ҷавоб дод: Ё Расулаллоҳ (с) ! Ман бо ҷону дил ҳозирам! Сипас эшон рафта аз мавқеъият ва вазъияти неруҳои душман иттилоъотеро барои Расулуллоҳ (с) овард. Ин амалро то се бор анҷом дод. Сипас Паёмбар (с) фармуд: فداک ابی و امی! Падару модарам фидоят бод!
Ба ростӣ ин имтиёз ва ифтихори бузурге аст барои шахсе, ки ин ҷумла аз ҷониби Расулуллоҳ (с) хитоб ба ӯ гуфта шавад. Расулуллоҳ (с) ин ҷумларо ( فداک ابی و امی) дар ҷанги Уҳуд низ ба иллати рашодатҳо ва фидокориҳои Зубайр (р) фармуда буданд.
АЛОҚА ВА МУҲАББАТИ РАСУЛУЛЛОҲ (С) БА ҲАЗРАТИ ЗУБАЙР (Р)
Чунонки қабл ан зикр шуд Расулуллоҳ (с) алоқа ва муҳаббати бисёр зиёде нисбат ба ҳазрати Зубайр (р) доштанд. Бар асари муҳаббати беш аз ҳад чандин бор ба эшон хитоб кард: (فداک ابی و امی) Падару модарам фидоят бод! Ин ношӣ аз муҳаббати вофири Паёмбар (с) нисбат ба ин шогирди ҷавон ва рашидаш мебошад.